नांदेडच्या गोविंद नगरमध्ये नागरिकांना नळाऐवजी गटाराचे पाणी; आरोग्याचा गंभीर प्रश्न

नांदेड, दि. ३ ऑक्टोबर – नांदेड शहरातील गोविंद नगर परिसरातील नागरिक सध्या गंभीर पाणी समस्येला सामोरे जात आहेत. गेल्या काही दिवसांपासून या भागात नळांमधून पिण्यायोग्य पाण्याऐवजी थेट गटाराचे, दुर्गंधीयुक्त व दूषित पाणी येत आहे.

नागरिकांच्या म्हणण्यानुसार, या पाण्यामुळे लहान मुले, वृद्ध आणि महिलांच्या आरोग्यावर मोठा परिणाम होत असून त्वचारोग व पोटाचे आजार वाढण्याची भीती निर्माण झाली आहे.

नागरिकांचा संताप – “पिण्याच्या पाण्यात आळे व कचरा”

Manchaha Mic India News चा प्रतिनिधी घटनास्थळी पोहोचला असता, नागरिकांनी नळातून येणारे पाणी दाखवले. या पाण्यात आळे, कचरा व दुर्गंधी स्पष्ट दिसत होती. स्थानिक नागरिकांचे म्हणणे आहे की, पाणीपुरवठा लाईन आणि सांडपाणी गटार लाईन एकमेकांत मिसळल्या असाव्यात.

प्रशासन व जनप्रतिनिधींकडे दुर्लक्ष

नागरिकांनी या संदर्भात महानगरपालिकेला वारंवार तक्रारी केल्या असल्या तरी अद्याप कोणतीही कारवाई झालेली नाही. “निवडणुकीच्या वेळी घराघरात येणारे नेते, आता आमच्या आरोग्याकडे दुर्लक्ष करत आहेत,” अशी खंत नागरिकांनी व्यक्त केली आहे.

नागरिकांची मागणी

दूषित पाणीपुरवठ्याचा तात्काळ तपास करावा

स्वच्छ पिण्याच्या पाण्याचा पुरवठा त्वरित सुरू करावा

पाणी व गटार लाईनची तपासणी करून कायमस्वरूपी उपाययोजना कराव्यात

👉 नागरिकांचे स्पष्ट आवाहन –
“आम्हाला राजकारण नको, फक्त स्वच्छ पाणी द्या!”